En cours de chargement...
Hih 'Cidamna Ding Singkung Manpha Pawlkhat' cih laibu sungah 'Singkung lopa nam 20' te' manphatna leh a nungthute kigelh hi. Tua bangin singkung lopate' manphatna-a kigelh ciangin, ngaihsut mawkmawk thu, upmawh, phuaktawm, leh lamet thute bulphuh in kigelhlo aa, 'scientific research' a kici, hithei takpi maw, hithei takpilo, maan takpi maw, maan takpilo, cih kician takin kancianna (research) panin a kimukhia thute bulphuh in kigelh hi Hih laibu sungah: Kuhku (Siris), Lim/Tawsaw (Oak), Zawngtah (Stink Bean), Baklawng (Indian Trumplet), Tama (Neem), Apple, Thawhbat (Avocado), Nahtang (Banana), Patkung (Cotton), Leenggah (Grape), Sakol Khekhap (Pennywort), Aisan (Tumeric), Phulun/Lothang San (Onion), Lothang Kaang (Garlic), Gatam (Jack Bean), Ankambul San (Carrot), Rosemary, Lonamsia (Mint), Umpawng (Chayote), leh Thaksing (Lemongrass) te' manphatna kigelh hi.
Singkung lopate' manphatna cih sungah, kiim le paam tung tawnin phattuamna hong piak theih thute leh zatui zaha dingin a kizat theihna thute kihel hi. Tuate sung panin, cidamna ding hong piak theih thute kibulphuh diak aa, koici zat ding cih dongin kigelh hi. A diakin, sikhang, zunkhum, lungtangna, tuapna, gilsungna, leh cancer natnate kibulphuh in, tua natnate a damna dingin ahuh thei singkung lopate sung pan mikimin a kithei diak singkung lopate akiteng khia-ahi hi.
Tua singkung lopate' manphatna bek hilo in, a ciinzia ding leh a khoi zia ding aa kipan, acii nam bangzah om cih dongin kigelh ahih manin, a sin pah nuamte leh, singkung lopate' thu a lunglutte' a dingin manpha mahmah ding hi.