Motsadi ke Lefika - E-book - ePub

Karolo ya ntlha ya terama re bona mmemogolo le ditlogolwana tsa gagwe tse pedi. Mongwe wa ditlogolwana tse pedi tse o ikobile thata e bile o reetsa le go latela melao ya ga mmemogoloagwe fa yo mongwe e le tlhogo nkope a sa reetse a ikgatholosa ditaelo. O ipelaetsa gore ga a amogelwa mo lapeng la ga mmemogoloagwe ke sone se a sa reetseng melao a tlalatlala le mebila a dira jaaka a rata mme seo se ama mmemogolo mo go sa siamang.
Mmemogolo Serunya o amiwa ke bolwetse jwa pelo mme o iphitlhela a le kwa bookelong. Karolo ya bobedi ba lelapa la ga Mosime ba iphitlhela mo seemong se se ngamolang pelo fa ngwana wa bone a tsena mo mathateng ka lebaka la lonyatso le go sa reetse batsadi. Mosime o itsenya mo seemong se se tsenyang botshelo jwa gagwe mo dipharagobeng ka jalo batsadi ba gagwe ba tshwanetse ba ema le go mo thusa le fa tota ba ne ba swabisitswe le go utlwisiwa botlhoko ke mekgwa ya gagwe.
Batsadi ba gagwe ba dumela thata mo setsong sa bona ke sone se ba itlhopelang go fodisa bolwetse jo bo neng bo kgogogetse Mosime ka ditlhare tsa setswana tse e leng gore e le ruri di ile tsa fodisa bolwetse jwa gagwe. Karolo ya boraro re bona mosadi yo o lebanweng ke loso mme a tlhoka kagiso le boitshwarelo mo go morwadie yo a ileng a mo latlha e sa le losea. O batla go baakanya diphoso tsotlhe tsa gagwe fela seo se ama morwadie mme o palelwa ke go mo itshwarela.
Mathata le dikgwetlho tsotlhe tse a rakaneng le tsone fa a tla a gola di mo paledisa go lebalela mmaagwe diphoso tsa gagwe. Se se itumedisang ke gore kwa bokhutlong jwa terama kagiso le lorato di a rena mo malapeng a otlhe, botlhe ba a itshwarelana le go tswelapele ka botshelo.