En cours de chargement...
Eccu una cullezzione bella pretensiunuta è bella strosa, chjamata madamicella, " Veranu di i pueti ", è chi ! Eccula qui, è guasgi guasgi, a si ghjoca cù i ghjorni... Vole, iè vole !, festighjà per ogni Veranu, a creazione puetica, sia cù un solu autore, sia cù parechji ! A brama l'hà chjuccuta, chi a si cerca cù u Tempu... U cunniscite bè à quellu, à quandu ci seguita, à quandu ci punta, à quandu ci passa ancu davanti.
Hè quellu chi và, o chi vene, infine per taglià à l'accorta, hè sempre per passà. Ma ùn appiate paura ! Chi u tempu di a puesia ùn hè quellu di u pueta... In l'abbacinu di e so stonde magiche face nasce tandu un sintimu strettu di communione, sussuru frescu chi ci arrechja un versu pueticu da scunfinà tutti l'orizonti di l'età. Da fa ne ballà isse pagine bianche è nere carche di sognu è stampate d'emuzione.
Tù chi cerchi à sente, oghje, o puru dumane, u piacè di issa parolla in aspettu, ch'è tù sia purtatu da issu muvimentu, aldilà di tè, induve si strappa u lume, in cor'di i niuli frasturnati di i celi veranili, in a carezza di i primi raghji di sole, da anticipà l'avvene !